హోటళ్లు, టిఫిన్ సెంటర్ల యజమానులను బెదిరించి డబ్బులు వసూలు చేస్తున్న ముఠా అరెస్ట్

RAMACHANDRAPURAM, Dr. B.R. Ambedkar Konaseema (VISWAM VOICE DESK):

రామచంద్రాపురం మార్కెట్ సెంటర్ పరిధిలో చిన్న టిఫిన్ సెంటర్లు మరియు హోటళ్ల యజమానులను భయభ్రాంతులకు గురిచేసి బలవంతంగా వసూళ్లకు పాల్పడుతున్న ముఠాను పోలీసులు అరెస్ట్ చేశారు.

కుడిపూడి అంజిబాబు అనే వ్యక్తి నడుపుతున్న టిఫిన్ సెంటర్‌‌కు అక్టోబర్ 1వ తేదీ ఉదయం వచ్చిన ఒక వ్యక్తి, సాయంత్రం వేళకు తిరిగి వచ్చి ఇడ్లీలు పాడైపోయాయని, తన కూతురు ఆసుపత్రిలో చేరిందని ఆరోపించారు. హోటల్‌లో గొడవ సృష్టించి కౌంటర్లు, ప్లేట్లు పగలగొట్టి సిబ్బందిని బెదిరించి యాభై వేల రూపాయలు డిమాండ్ చేయగా, నగదు మరియు ఫోన్‌పే ద్వారా మొత్తం ఇరవై మూడు వేల రూపాయలు వసూలు చేశారు. అదే రోజు రాత్రి పాత బస్ స్టాండ్ ప్రాంతంలోని మరో హోటల్‌కు వెళ్లి అక్కడ ఉన్న సిబ్బందిని దుర్భాషలాడారు.

పోలీసుల దర్యాప్తులో భాగంగా జూలై 30వ తేదీన ఎల్ఐసీ సెంటర్‌‌లోని మరో ఫుడ్ స్టేషన్ వద్ద కూడా ఇదే తరహాలో మంత్రులు మరియు ఫుడ్ ఇన్స్పెక్టర్ల పేర్లు చెప్పి పదహారు వేల రూపాయలు వసూలు చేసినట్లు తేలింది. వీరే కాకుండా తోపుడు బండి వ్యాపారులను సైతం బెదిరించి మూడు వేల నుండి పది వేల రూపాయల వరకు వసూళ్లకు పాల్పడుతున్నట్లు గుర్తించారు.

నాగులచెరువు సురేష్, సంపర శేఖర్, గెడ్డాడ రామకృష్ణలను నిందితులుగా గుర్తించి రామచంద్రాపురం పోలీస్ స్టేషన్‌లో కేసు నమోదు చేశారు. ఫోన్‌పే లావాదేవీలు మరియు సీసీటీవీ फुటేజ్‌ ఆధారంగా దర్యాప్తు కొనసాగిస్తున్నారు. ఇటువంటి బెదిరింపులకు ఎవరూ భయపడవద్దని, ఎవరికైనా ఇలాంటి అనుభవాలు ఎదురైతే వెంటనే పోలీసులకు సమాచారం అందించాలని అధికారులు కోరారు.