నిబంధనలకు పాతర! కాకినాడ ‘ ఇంటెక్ డిపిఓ’

సంస్థపై లేబర్ ఆఫీసర్ లక్ష్మి స్నేహ సీరియస్

ముందస్తు అనుమతి లేకుండానే విధులు.

కనీసం బోర్డు కూడా లేని వైనం

నిబంధనలు అతిక్రమిస్తే’ జేసీ నోటీసులు’ తప్పవని హెచ్చరిక

కాకినాడ, విశ్వం వాయిస్ న్యూస్ :
అంతర్జాతీయ కార్మిక దినోత్సవం సందర్భంగా కార్మికుల హక్కులను గౌరవిస్తూ ప్రభుత్వం సెలవు ప్రకటించినా, కొన్ని ప్రైవేట్ సంస్థలు బరితెగిస్తున్నాయి. ప్రభుత్వ నిబంధనలను బేఖాతరు చేస్తూ, సిబ్బందితో మేడే రోజున కూడా పని చేయిస్తున్న వైనం కాకినాడలో వెలుగు చూసింది. నగరంలోని రమణయ్యపేటలో ఉన్న **’ఇంటెక్ డిపిఓ సర్వీసెస్ ప్రైవేట్ లిమిటెడ్’** కంపెనీపై అసిస్టెంట్ లేబర్ ఆఫీసర్ లక్ష్మీ స్నేహ ఆకస్మిక తనిఖీలు నిర్వహించారు.
**నిబంధనలు గాలికి..**
ప్రపంచవ్యాప్తంగా కార్మిక దినోత్సవాన్ని పురస్కరించుకుని కార్యాలయాలకు సెలవు ప్రకటించాలన్న కనీస నిబంధనను సదరు సంస్థ విస్మరించింది. సమాచారం అందుకున్న అసిస్టెంట్ లేబర్ ఆఫీసర్ లక్ష్మీ స్నేహ నేరుగా కంపెనీకి చేరుకుని తనిఖీలు చేపట్టారు. సెలవు రోజున కార్యకలాపాలు నిర్వహించడంపై ఆమె యాజమాన్యంపై ఆగ్రహం వ్యక్తం చేశారు.
**ముందస్తు మెయిల్ ఎక్కడ?**
కార్మిక శాఖ మార్గదర్శకాల ప్రకారం.. విదేశీ కంపెనీలతో ఒప్పందాలు ఉన్న సాఫ్ట్‌వేర్ సంస్థలు అనివార్య కారణాల వల్ల సెలవు రోజుల్లో పని చేయాల్సి వస్తే, ఆ విషయాన్ని ముందుగానే కార్మిక శాఖ కార్యాలయానికి మెయిల్ ద్వారా తెలియజేయాల్సి ఉంటుంది. అయితే, ‘ఇంటెక్ డిపిఓ’ సంస్థ అటువంటి ఎటువంటి అనుమతులు తీసుకోలేదని, కనీసం సమాచారం కూడా ఇవ్వలేదని తనిఖీల్లో తేలింది. దీనిపై అక్కడి సిబ్బందిని మరియు బాధ్యులను ఆఫీసర్ నిలదీశారు.
**బోర్డు లేని సాఫ్ట్‌వేర్ కంపెనీ!**
తనిఖీల సందర్భంగా మరో విస్తుపోయే నిజం వెలుగు చూసింది. ప్రభుత్వ నిబంధనల ప్రకారం ప్రతి సంస్థ తన పేరును స్పష్టంగా కనిపించేలా బోర్డు డిస్‌ప్లే చేయాల్సి ఉంటుంది. కానీ, ఈ సంస్థ కనీసం బోర్డు కూడా లేకుండా కార్యకలాపాలు సాగిస్తుండటంపై ఏఎల్వో తీవ్ర అభ్యంతరం వ్యక్తం చేశారు.
**కఠిన చర్యలు తీసుకుంటాం: లక్ష్మీ స్నేహ **
చట్టం ఎవరికైనా ఒక్కటే. మేడే రోజున అనుమతి లేకుండా సిబ్బందితో పని చేయించడం నిబంధనలకు విరుద్ధం. సంస్థ పేరుతో వెంటనే బోర్డు ఏర్పాటు చేయాలి. లేనిపక్షంలో ఉన్నతాధికారుల దృష్టికి తీసుకెళ్లి జెసి నోటీసులు జారీ చేస్తాం. కార్మిక చట్టాలను ఉల్లంఘించే సంస్థలపై కఠినంగా వ్యవహరిస్తాం.
ఈ తనిఖీ ఇప్పుడు కాకినాడలోని ఇతర ప్రైవేట్ మరియు సాఫ్ట్‌వేర్ సంస్థల్లో కలకలం రేపింది. ప్రభుత్వ నిబంధనలను అతిక్రమిస్తే మూల్యం చెల్లించుకోక తప్పదని కార్మిక శాఖ అధికారులు స్పష్టం చేస్తున్నారు.