అదుపుతప్పినా, ఆదమరిచినా, అంతేనా..?

రాష్ట్రవ్యాప్తంగా స్త్రీ శక్తి పథకం ద్వారా మహిళలకు ఉచిత బస్సు ప్రయాణం అవకాశం కల్పించడం మహిళల పాలిట వరంగా కనబడుతున్నా, విద్యార్థులకు మాత్రం భారమైన శాపంగా మారింది. ఆర్టీసీ ప్రయాణం సురక్షితం, సుఖవంతం అనే పదానికి పూర్తి విరుద్ధంగా ఒక వైపు బస్సుల కొరత, మరొక వైపు అధికారుల నిర్లక్ష్యంతో ప్రతీ ప్రాంతం లోనూ విద్యార్థులు తీవ్ర ఇబ్బందులు పడుతున్నారు. మహిళలకు ఉచిత బస్సు ప్రయాణాన్ని చేపట్టిన పాలకులు, అధికారులు అందుకు తగినట్లుగా అదనపు బస్సులు ఏర్పాటు చేయడంలో నిర్లక్ష్యం వహిస్తూ యువతను ప్రమాదపు అంచున నిలబెడుతున్నారు. దీంతో పాఠశాలలకు, కళాశాలలకు వెళ్లడానికి బస్సుల్లో ప్రయాణించే విద్యార్థులు తీవ్ర ఇబ్బందులు పడుతున్నారు. డాక్టర్ బి.ఆర్ అంబేద్కర్ కోనసీమ జిల్లా మండల కేంద్రమైన రాయవరం నుండి డిగ్రీ, ఇంజనీరింగ్ చదువుల నిమిత్తం విద్యార్థులు, రామచంద్రపురం పట్టణానికి అనునిత్యం అధిక సంఖ్యలో ప్రయాణం చేస్తున్నారు. రామచంద్రపురం నుండి అనపర్తి కి ఎదురెదురుగా ప్రయాణించే బస్సుల సంఖ్య తక్కువగా ఉండడంతో, కళాశాలలకు, తరగతులు ప్రారంభమయ్యే సమయానికి చేరుకోవడానికి విద్యార్థులు, ప్రాణాలకు తెగించి సాహసాలు చేయాల్సిన పరిస్థితి ఏర్పడింది. పాఠశాలలు, కళాశాలలకు వెళ్లడానికి, రావటానికి ఉన్న బస్సులో అధిక రద్దీ ఉండటంతో విద్యార్థులు తీవ్ర ఇబ్బందులు పడుతూ, ప్రమాదపుటంచున బస్సులో ఫుట్ బోర్డుపై వ్రేలాడుతూ ప్రయాణం సాగిస్తున్నారు. ఆ సమయంలో ఆర్టీసీ అధికారులు మరొక బస్సును నడిపితే విద్యార్థుల ఇబ్బందులు తొలగించవచ్చునని గ్రామస్తులు అంటున్నారు. అధికారులు ఆదిశగా చర్యలు తీసుకోక పోవటంతో విద్యార్థులు తీవ్ర ఇబ్బందులు పడుతున్నారు. పైగా బస్సులో విధులు నిర్వహిస్తున్న ఆర్టీసీ సిబ్బంది కూడా విద్యార్థులపై దురుసుగా ప్రవర్తిస్తున్నారని ప్రయాణికులు చెబుతున్నారు. ఆగస్టు 15 నుంచి మహిళలకు ఉచిత బస్సు సౌకర్యాన్ని కల్పించిన ప్రభుత్వం బస్సు సర్వీసులను పెంచకపోవటం వల్లనే విద్యార్థులు ఇబ్బందులు పడాల్సి వస్తోందని పలువురు విమర్శిస్తున్నారు. ఇప్పటికైనా పాలకులు, అధికారులు స్పందించి విద్యార్థులకు ప్రమాదకరమైన ప్రయాణం లేకుండా చర్యలు తీసుకోవాలని, “చేతులు కాలాక ఆకులు పట్టుకున్న”  చందాన ప్రమాదం జరిగాక బాధపడటం కంటే, ముందుగా చర్యలు తీసుకుని ప్రమాదాలు నివారించాలని విద్యార్థులు, తల్లిదండ్రులు కోరుతున్నారు.

ప్రజా స్పందన 

రహదారి ప్రక్కనే కొన్ని సంవత్సరాలకు వ్యాపార కార్యకలాపాలు నిర్వహిస్తున్నాను. బస్సులు కొరత వలన విద్యార్థులు చాలా ఇబ్బంది పడుతున్నారు. కేవలం ఉచిత బస్సు కల్పించడం వలనే ఈ పరిస్థితి కాదు. ఉదయం 8: 00 నుండి 9:00 గంటల మధ్య రాయవరం నుండి చాలామంది విద్యార్థిని,విద్యార్థులు రామచంద్రపురం కాలేజ్ లకు అధిక సంఖ్యలో వెళ్తుండడం వలన రద్దీ పెరిగిపోతుంది. బస్సు లో నిలవడానికి సైతం చోటు సరిపోక, సమయానికి చేరాలన్న తొందరలో పుట్ బోర్డు పైనే వారు నిలబడి, బస్సును పట్టుకుని వేలాడుతున్నారు. ఇరుకు రహదారి కావడంతో వారికి చేయి జారినా, పట్టు తప్పినా ఆ విద్యార్థుల కుటుంబాలకు తీవ్రశోకం మిగులుతుంది. ముఖ్యంగా ఆ సమయంలో అధికారులు మరొక బస్సును అదనంగా నడిపితే సమస్యను పరిష్కరించవచ్చు.

            నల్లమిల్లి రామకృష్ణారెడ్డి, వ్యాపారి, రాయవరం

విద్యార్థుల స్పందన 

నేను రామచంద్రపురంలో ఇంజనీరింగ్ చదువుతున్నాను. కాలేజీకి వెళ్లడానికి ఆర్టీసీ బస్సులోనే ప్రయాణం చేస్తాను. ప్రతిరోజు ఉదయం 8:00 గంటలకే రాయవరం బస్టాండ్ కు తోటి విద్యార్థులతో కలిసి చేరుకుంటాము. సమయానికి కాలేజ్ కి చేరుకోవడం కోసం బస్సు కోసం ఎదురు చూస్తాము. కానీ అప్పటికే బస్సు నిండిపోవడంతో మేము ఎక్కువమంది నిలబడిన చోట, డ్రైవర్ బస్సును ఆపకుండా వేగంగా ముందుకు నడపడం తో ఆ బస్సు వెనక మేము పరిగెత్తడం చాలా ఇబ్బందికరంగా ఉంది. బస్సు లోపల స్థలం లేక ప్రమాదం అని తెలిసిన ఫుడ్ బోర్డు పైనే ప్రయాణం చేస్తున్నాము. భయం భయంగానే ప్రయాణం చేసి కళాశాలకు వెళ్లాల్సి వస్తుంది. రామచంద్రపురం, అనపర్తి మధ్య నడిచే మూడు బస్సులతో పాటు ఉదయం సమయంలో మరొక బస్సు అదనంగా నడిపితే బావుంటుంది.

          బైలపూడి హరి సూర్య భాస్కర్, విద్యార్ధి, రాయవరం