సత్యం,ధర్మం, శాంతి, ప్రేమ, అహింస వంటి జీవిత సత్యాలు ప్రభోదం
ఎంపీపీ నౌడు వెంకటరమణ
సత్యం,ధర్మం, శాంతి, ప్రేమ, అహింస వంటి మంచి గుణాలే విలువైన ఆస్తిగా జీవించడమే కాక, సమాజానికి ఆధ్యాత్మికత, సేవాభావం నేర్పించిన శక్తి భగవాన్ సత్యసాయి బాబా అని మండల పరిషత్ అధ్యక్షులు నౌడు వెంకటరమణ పేర్కొన్నారు. డాక్టర్ బి ఆర్ అంబేద్కర్ కోనసీమ జిల్లా, మండల కేంద్రమైన రాయవరం మండల పరిషత్ కార్యాలయంలో భగవాన్ శ్రీ సత్య సాయి బాబా వారి శత జయంతి వేడుకలను ఎంపీడీవో కీర్తి స్పందన ఆద్వర్యంలో ఆదివారం నిర్వహించారు. తొలుత సత్యసాయి బాబా చిత్రపటానికి పూలమాలలు వేసి జయంతి వేడుకలు ప్రారంభించగా, ఈ కార్యక్రమానికి ముఖ్య అతిథిగా పాల్గొన్న ఎంపీపీ నౌడు వెంకటరమణ మాట్లాడుతూ తన జీవితమే ఒక పాఠంగా ఎందరో జీవితాలను వెలిగించిన శక్తి సత్యసాయిబాబా అని, సత్యం,ధర్మం, శాంతి, ప్రేమ, అహింస వంటి మంచి గుణాలే విలువైన ఆస్తిగా జీవించి, ఎంతో మంది దేశ,విదేశీయులకు ఆదర్శప్రాయంగా నిలిచారని భగవాన్ సత్యసాయి బాబా సేవలను కొనియాడారు. ఈ కార్యక్రమంలో రాయవరం గ్రామ అభివృద్ధి కమిటీ చైర్మన్ ఉండవిల్లి రాంబాబు, జనసేన పార్టీ గ్రామ నాయకులు దేవిశెట్టి కోటేశ్వరరావు, సత్య సాయిబాబా సేవా సమితి సభ్యులు, మండల పరిషత్ కార్యాలయ సిబ్బంది, రాయవరం గ్రామ పంచాయతీ కార్యదర్శి పి. వెంకటరత్నం, సచివాలయం-2 సెక్రటరీ వెంకటలక్ష్మి తదితరులు పాల్గొన్నారు.
