మృగాళ్ళ ఆటవిక వాంఛలకు బలైపోతున్న పసిగుడ్లు

సమాజంలో పురుషుల వేదింపులు, అమానవీయ చర్యలతో స్త్రీలకు రక్షణ కరువైందని ఆవేదనతో కూడిన ఆర్తనాదాలు మిన్నంటుతుండగా, అంతకంటే భయంకరంగా పసిపిల్లలపై అఘాయిత్యాలకు పాల్పడుతున్న మృగాళ్ల సంఖ్య పెరిగిపోవడం మరింత ఆందోళనకు గురి చేస్తోంది. మొన్న మాచవరం,నిన్న తుని , నేడు బాణాపురం అన్నట్లుగా, జరిగిన ఘటనలు ఇందుకు ఉదాహరణలు. మాచవరం లో ఉపాధ్యాయుని ముసుగులో మైనర్ బాలికను తల్లిని చేసిన ఉపాద్యాయ వృత్తికే అపకీర్తి తెచ్చిన మృగాడి ఘటన మరువక ముందే, గత వారం లో కాకినాడ జిల్లా, తుని గురుకుల పాఠశాల లో చదువుతున్న మైనర్ బాలికను మాయ మాటలు చెప్పి, తాతను అని నమ్మించి, బాలికకు చిన్న, చిన్న వస్తువులు ఇచ్చి సహాయపడుతున్నట్లుగా నటించి, ఆ బాలిక పై పలుమార్లు అఘాయిత్యానికి ఒడిగట్టడం జరగగా, స్థానిక యువకుల ప్రశ్నించడంతో ఘటన వెలుగు లోకి వచ్చి, రాష్ట్రంలో సంచలనంగా మారింది. ఘటన జరిగి నెల రోజులైనా గడవకుండానే మరో పాశవిక ఘటన వెలుగు చూడడం చిన్నారుల భవితవ్యానికే ప్రశ్నార్థకంగా కనబడుతుంది. ఉపాధ్యాయునిగా కనబడుతూనే కీచకుని గా వ్యవహరించి, డాక్టర్ బి ఆర్ అంబేద్కర్ కోనసీమ జిల్లా, ఐ.పోలవరం మండలం,బాణాపురం లో చిన్నారి జీవితాన్ని చిదిమేసిన ఘటన మరింత ఆందోళన కలిగిస్తుంది. బాలికలకు చిన్నపాటి తినుబండారాలు అందిస్తూ వారిని లొంగదీసుకుని వారిపై అఘాయిత్యాలకు పాల్పడడం పరిపాటిగా మారింది. తమ జాతికి చెందిన పసి జంతువులపై, పశువులైనా జాలి చూపిస్తాయి కాని కళ్ళముందు నడయాడిన పసిపిల్లలతో తమ కామవాంఛ తీర్చుకోవడానికి ఏమాత్రం వెనకాడని మృగాళ్ళ పోకడలు. మనిషి కన్నా పశువులే నయం అనిపించేలా చేస్తున్నాయి. కాగా రెండు ఘటనల లో అఘాయిత్యాలకు పాల్పడిన వారు ప్రజా ప్రతినిధులుగా సమాజంలో చెలామణి అవడం మరొక దౌర్భాగ్య అంశం. బాధ్యత కలిగిన స్థానంలో ఉండి, ప్రజా సమస్యలపై మాట్లాడే స్థానంలో ఉన్న వారు పాశవిక చర్యలకు పాల్పడడం చూస్తే, అధికార మధం ,ఏం చేసినా చెల్లుతుంది అనే స్వభావం మరింత దిగజారి పోయేలా ప్రవర్తింపచేస్తున్నాయా అనే అనుమానం కలుగుతోంది. బ్రిటిష్ వారు వెళ్ళిపోతే కాదు, అర్థరాత్రి ఆడది ఒంటరిగా తిరిగిన నాడే దేశానికి స్వాతంత్య్రం వచ్చినట్లని మహాత్మా గాంధీ గంటాపదంగా చెప్పిన మాటలు గుర్తు చేసుకుంటూ, అర్థరాత్రి స్త్రీ ఒంటరిగా నడిచి వెళ్ళడం సంగతి ప్రక్కన పెడితే, పట్టపగలు ఆడుకునే పసిపిల్లలకే భద్రత కరువైందని మహిళా సంఘాలు ఆవేదన వ్యక్తం చేస్తున్నాయి. గాంధీజీ కోరిన స్వాతంత్ర్యం దేశంలో రావాలంటే పటిష్ఠమైన చట్టాలు దేశంలో అమలు కావాలని, అఘాయిత్యాలకు పాల్పడిన నిందితులను వాయిదా పద్దతిలో కాక, పాస్ట్ ట్రాక్ కోర్టు ద్వారా నేర నిరూపణ జరిగించి, నిందితుడిని నెలలు,సంవత్సరాలు పోషించకుండా నిర్థారణ జరిగిన వెంటనే కఠినంగా శిక్షించాలని మహిళా సంఘాలు ఆరోపిస్తున్నాయి. దేశ ద్రోహ నేరానికి ఎలాంటి శిక్షలు అమలు చేస్తున్నారో, అలాంటి కఠినమైన శిక్షలను నిందితులు ఎంతటివారైనా ఉపేక్షించకుండా, శిక్షిస్తే ఫలితం ఉంటుందని పలువురు ఆశాభావం వ్యక్తంచేస్తున్నారు. ముఖ్యంగా దేశంలో మహిళలంటే ప్రారంభం నుండి సమాజంలో చిన్నచూపు చోటుచేసుకోవడం, దీనిని అలుసుగా తీసుకుని పురుషాహంకారం రాజ్యమేలడం మహిళలు, మైనర్ బాలికలపై అఘాయిత్యాలు జరిగేందుకు మూల కారణమని చెప్పవచ్చు, భారత విద్యా వ్యవస్థలో ప్రాథమిక స్థాయి నుండే మహిళలపై గౌరవం పెరిగేలా పాఠ్యాంశాలు రూపొందించాలి, అరచేతిలో ఉన్న మొబైల్ ఫోన్ ద్వారా అశ్లీలతను ప్రోత్సహించే వెబ్సైట్ లు, వెబ్ సిరీస్ లను అదుపు చేయడం అత్యవసరం, నిఘా వ్యవస్థ ను పటిష్ఠం చేసి మహిళలు, మైనర్ లకు భద్రత కల్పించేలా పాఠశాలలు, పలు ప్రాంతాలలో మహిళా పోలీసుల పర్యవేక్షణ ఏర్పాటు చేసి, పాఠశాలలను వారానికి ఒకసారి సందర్శించి విద్యార్ధిని లతో మాట్లాడి, పరిస్థితులను గమనించేలా చర్యలు తీసుకోవాలి , తల్లిదండ్రులు సైతం తమ పిల్లలకు “గుడ్ టచ్, బ్యాడ్ టచ్” అవగాహన కల్పించి ఎలా స్పందించాలో వారికి నేర్పించాలి, పిల్లల భద్రత విషయంలో రాజీ పడకూడదనే విషయం గతం లో జరిగిన పలు సంఘటనలు సాక్ష్యాలుగా కనబడుతున్నాయి. ముక్కు పచ్చలారని పసిపిల్లలను చూసి, మృగాళ్లకు పుట్టే కామవాంఛ, అల్లారుముద్దుగా పెంచుకున్న తల్లిదండ్రుల జీవితాలలో వెలుగును దూరం చేసి మోడువారేలా చేస్తోంది.