అమలాపురం కు చెందిన శారీరక వైకల్యం గల నాగేశ్వరరావు అనే వ్యక్తి ఉద్యోగం ఇప్పిస్తానని మోసపూరితంగా నమ్మించిన శంకర్రావు అనే వ్యక్తి చేతిలో బలయ్యాడు. ఉద్యోగం అవకాశమంటూ చెన్నైకు తీసుకెళ్లిన అతను, నాగేశ్వరరావు దగ్గర ఉన్న డబ్బులను తీసుకొని చెన్నై సెంట్రల్ రైల్వే స్టేషన్‌లో అతడిని భార్య, చిన్న పిల్లలతో వదిలేసి పరారయ్యాడు.
ఈ మోసానికి గురైన నాగేశ్వరరావు, తన పరిస్థితిని జిల్లా జాయింట్ కలెక్టర్ నిశాంతి కి ఫోన్ ద్వారా వివరించాడు. భార్య, పిల్లలతో తీవ్ర ఇబ్బందులు ఎదుర్కొంటున్నామని తెలిపాడు.
ఈ విషయం తెలుసుకున్న జాయింట్ కలెక్టర్ మానవతా దృష్టితో స్పందించి, తక్షణమే చెన్నై సెంట్రల్ రైల్వే స్టేషన్ ఆర్‌పీఎఫ్ సిబ్బందితో సమన్వయం చేసి నాగేశ్వరరావు కుటుంబానికి రైలు టిక్కెట్లు, ప్రయాణ సౌకర్యాలను ఏర్పాటు చేయించారు. అంతేగాక, అవసరమైన ఖర్చుల కోసం తన సొంత డబ్బును పంపించి ఆ కుటుంబానికి మానవతా హస్తం అందించారు.
