పేడ, ఇంగువల ద్రావణం రసాయన ఎరువులకు ప్రత్యామ్నాయం
చెల్లూరు లో పొలంబడి కార్యక్రమం ద్వారా రైతులకు అవగాహన
డాక్టర్ బి ఆర్ అంబేద్కర్ కోనసీమ జిల్లా, రాయవరం మండలం, చెల్లూరు గ్రామంలో మండల వ్యవసాయ అధికారి కెవిఎన్ రమేష్ కుమార్ ఆధ్వర్యంలో రైతులకు పొలంబడి కార్యక్రమం నిర్వహించారు. స్థానిక రైతు పెదబాబు కు చెందిన పొలంలో ఏర్పాటు చేసిన ఈ కార్యక్రమం ద్వారా పొలం పరిసరాలలో కనిపించే పురుగులలో రైతులకు మేలు చేసే పురుగులు, హాని కలిగించే పురుగులను గూర్చి రైతులకు వ్యవసాయ అధికారి వివరించారు. వరి పొలాల్లో నష్టం కలిగించే కాండంతొలచు పురుగు, ఆకుముడత పురుగు, పచ్చదోమ వంటి శత్రు పురుగుల ఉధృతిని గుర్తించడానికి పసుపు రంగు జిగురుతో కూడిన అట్టలను పొలంలో ఎకరానికి పది అట్టలు చొప్పున అమర్చారు. సాలీడు,తూనీగ వంటి మిత్ర పురుగులు రైతులకు నేస్తాలు అని సూచించారు. హాని కలిగించే పురుగులు ఉన్నప్పుడు మాత్రమే పురుగుమందులు పిచికారి అవసరం మేరకు చేయాలని, ఆకు ముడత కాండం తొలిచే పురుగుల నివారణ కోసం సాధారణంగా వాడే రసాయన పురుగుమందులతో వేప నూనె కలిపి వాడితే గ్రుడ్డు దశలో ఉన్న పురుగులను సమర్థవంతంగా ఎదుర్కొనగలమని ఆన్నారు. రసాయన పురుగు మందులకు ప్రత్యామ్నాయంగా పేడ-ఇంగువ ద్రావణాన్ని ఎకరానికి 5 లీటర్ల ద్రావణాన్ని 200లీటర్ల నీటిలో కలిపి వాడాలని అన్నారు. ఈ ద్రావణం వాడటం వలన మొక్కలలో వ్యాధి నిరోధక శక్తి పెరుగుతుందని,మట్టి సహజ సారాన్ని పెంపొందించుకుని రైతులకు మేలు చేస్తుందని, పేడ,మూత్రం,ఇంగువ కలిపి తయారు చేసిన ద్రావణాన్ని 1-2 రోజులు మాత్రమే నిల్వ ఉంచుకోవాలని,రసాయన మందులతో కలిపి ఉపయోగించ కూడదని ప్రకృతి వ్యవసాయ మాస్టర్,ట్రైనర్ కె.బాబురావు తెలిపారు. ఈ కార్యక్రమంలో పొలంబడి రైతులు, గ్రామ వ్యవసాయ సహాయకులు, ప్రకృతి వ్యవసాయ సిబ్బంది పాల్గొన్నారు.
