సోమేశ్వరం,లొల్ల గ్రామాలలో “పొలం పిలుస్తుంది”

భూసార పరీక్ష ఆధారంగా మండలంలోని ప్రతీ గ్రామ వ్యవసాయ క్షేత్రంలోనూ జింక్ లోపం గుర్తించామని, రైతులు గ్రామంలో గల రైతు సేవా కేంద్రంలో పేరు నమోదు చేయించుకోవడం ద్వారా దాళ్వా పంటకు ప్రభుత్వం ద్వారా రాయితీ లో జింక్ లభిస్తుందని మండల వ్యవసాయ అధికారి కెవిఎన్ రమేష్ కుమార్ తెలిపారు. రాయవరం మండలం, సోమేశ్వరం,లొల్ల గ్రామాలలో రైతులకు ఏర్పాటు చేసిన పొలం పిలుస్తుంది కార్యక్రమంలో ఆయన పాల్గొని రైతులకు పలు సూచనలు చేశారు. ముఖ్యంగా మోతాదుకు మించి యూరియాను వాడటం వలన వరిలో ఎండాకు తెగులు ఉదృతంగా వస్తుందని, కనుక యూరియాను అవసరం మేరకు మాత్రమే మితంగా వాడాలని ఆయన రైతులకు వివరించారు. ప్రస్తుతం కురుస్తున్న వర్షాల ప్రభావంతో మాగుడు ఉధృతి పెరిగే అవకాశాలు ఉన్నాయని, పొలం గట్లు శుభ్రం చేసుకోవాలని రైతులకు తెలిపారు. వరి పొలంలో తెగుళ్లకు వినియోగించే మందులు అవసరం మేరకు మాత్రమే పిచికారి చేయాలని విజ్ఞప్తి చేశారు. అన్నదాత సుఖీభవ కు సంబంధించిన పిర్యాదుల నమోదుకు ఈ నెల 20వ తేదీ వరకు మాత్రమే అవకాశం ఉంటుందని, అర్హత కలిగి, పధకం ద్వారా డబ్బులు జమ కాని పంట భూమి కలిగిన వారు రైతు సేవా కేంద్రంలో నమోదు చేసుకోవాలని ఆయన తెలిపారు. ఈ కార్యక్రమంలో సోమేశ్వరం పి.ఎ.సి.ఎస్ ప్రెసిడెంట్ శాఖా కోటేశ్వరరావు , జనసేన గ్రామ అధ్యక్షుడు శాఖా నాగేంద్ర, లొల్ల గ్రామ సర్పంచ్ చాట్రాతి జానకి రాంబాబు, లొల్ల గ్రామ టిడిపి అధ్యక్షులు యస్. గంగరాజు, గ్రామ వ్యవసాయ సహాయకులు రైతులు పాల్గొన్నారు.