ఘనంగా రాయవరం మునసబు 36 వ వర్థంతి కార్యక్రమం
డిల్లీ నుండి గల్లీ వరకూ రాజకీయం లో సిధ్ధహస్తం
రాయవరం లో అభిమానుల ఘన నివాళులు
దాతృత్వం తో ఎందరో అభాగ్యులకు తమ సొంత స్ధలాలను ఇళ్ళ కొరకు దానమివ్వడమే కాక, అనేకులు విద్యావంతులుగా మారడానికి పాఠశాలలు, కళాశాలలను స్థాపించి ప్రోత్సహించిన, రాయవరం మునసబు, వుండవిల్లి సత్యనారాయణ మూర్తి 36 వ వర్ధంతిని డాక్టర్ బి.ఆర్. అంబేద్కర్ కోనసీమ జిల్లా, మండల కేంద్రమైన రాయవరంలో గురువారం ఆయన అభిమానులు ఘనంగా నిర్వహించారు. వెదురుపాక తాలూకా రాయవరం గా పిలవబడే గ్రామాన్ని, మునసబు గారి రాయవరం అనేలా తన ప్రత్యేకతను చాటడమే కాక, గల్లీ నుండి ఢిల్లీ వరకూ రాజకీయం చేయడం లో అందెవేసిన చేయి గా మెలగడం ఆయనకే సొంతం, అప్పటి ప్రధాని ఇందిరాగాంధీని సైతం అపాయింట్మెంట్ అవసరం లేకుండా కలిసి మాట్లాడగలిగే సామర్థ్యం కలిగిన వ్యక్తి వుండవిల్లి సత్యనారాయణ మూర్తి. కాగా మండల కేంద్రమైన రాయవరంలో ఆయన వలన లబ్ది పొందిన పలు సామాజిక వర్గ ప్రజలు గురువారం సత్యనారాయణ మూర్తి కి ఘనంగా నివాళులు అర్పించారు. ఈ సందర్భంగా వెలమ సంఘీయుల పెద్దలు ఆయనతో తమకు ఉన్న అనుభవాలను తెలియచేస్తూ, పలు విషయాలను పంచుకున్నారు. వారు మాట్లాడుతూ, ఆంధ్రప్రదేశ్ రాష్ట్ర చరిత్రలో ఎక్కడా సిమెంట్ రోడ్లు లేని సమయంలో మునసబు, సత్యనారాయణ మూర్తి తమ పేటలో సిమెంట్ రోడ్లు నిర్మించారని, అగ్ని ప్రమాదం జరిగి గృహాల తో పాటు సమస్తం కాలి బూడిదైపోయిన సమయంలో ఆయన సొంత ట్రాక్టర్లను సమకూర్చి ఎన్ని అవసరమైతే అన్ని తాటిచెట్లను ఆయన సొంత స్థలం నుండి అందించి, గృహాలను నిలబెట్టి, ఆర్థిక సహాయం అందించారని, అనంతరం పక్కా ఇళ్ళు నిర్మించారన్నారు. ప్రజలు ఆర్థిక స్థితి సరిగా లేక పూట గడవడమే గగనమైపోయిన సమయంలో ఆయన ఎందరో బీదలకు ఆహారాన్ని అందించి ఆదుకున్నారని తమ అనుభవాలను పంచుకున్నారు. అనంతరం వుండవిల్లి సత్యనారాయణ మూర్తి విగ్రహానికి పూలమాలలు వేసి నివాళులర్పించి, జోహార్ నినాదాలను చేసారు. ఈ కార్యక్రమంలో వెలమ సంఘ పెద్దలు నౌడు వెంకట రమణ, బెల్లపు లక్ష్మణరావు, కొల్లి అప్పారావు, బండారు సోమినాయుడు, సప్పా తాతారావు, దేవిశెట్టి రాంబాబు తదితరులు పాల్గొన్నారు.
