మండలం (రాయవరం), East Godavari (VISWAM VOICE DESK):
మండలంలో వరి పంట దిగుబడి అంచనా కోసం పంట కోత ప్రయోగాలు ప్రారంభమవ్వగా, అర్ణబ్, మురసు తుపాన్ల ప్రభావంతో వరి పంటకు తీవ్ర నష్టం వాటిల్లి పంట దిగుబడి 50 శాతానికి పైగా తగ్గినట్లు మండల వ్యవసాయ అధికారి కె.వి.ఎన్. రమేష్‌కుమార్ తెలిపారు. దిగుబడి నష్టాలను శాస్త్రీయంగా అంచనా వేసేందుకు గణాంక శాఖ ఆధ్వర్యంలో గ్రామాల వారీగా పంట కోత ప్రయోగాలు నిర్వహిస్తున్నామన్నారు. దీనిలో భాగంగా శుక్రవారం మాచవరం గ్రామంలో రైతు ఉప్పలపాటి వెంకటేశ్వరరావుకు చెందిన వరి పొలంలో పంట కోత ప్రయోగాన్ని నిర్వహించారు. గణాంక శాఖ అధికారులు ర్యాండమ్ నంబర్ విధానంలో గ్రామంలోని నాలుగు పొలాలను ఎంపిక చేసి, నిర్దేశిత 25 చదరపు మీటర్ల విస్తీర్ణంలో పంట కోత నిర్వహించి దిగుబడిని నమోదు చేస్తున్నారు. రైతుల సమక్షంలో నిర్వహించిన మాచవరం ప్రయోగంలో గ్రామ సగటు దిగుబడి సుమారు 13 బస్తాలు, అంటే 75 కిలోల ధాన్యం మేరకు రీడింగ్ నమోదైనట్లు అధికారులు తెలిపారు. తుపాన్ల ప్రభావంతో వరి పంట దిగుబడి గణనీయంగా తగ్గడంతో రైతులు తీవ్రంగా నష్టపోయారని, పంట కోత ప్రయోగాల ద్వారా వాస్తవ దిగుబడి వివరాలను నమోదు చేస్తున్నట్లు వ్యవసాయ శాఖ అధికారి రమేష్ కుమార్ స్పష్టం చేశారు.
